Ontdooi die bevrore deegvelle by kamertemperatuur (of in die yskas) totdat dit hanteerbaar is. Rol dit met ’n koekroller op ’n oppervlak uit wat liggies met meel bestrooi is. Bak die geregte hieronder in ’n voorverhitte oond teen 200°C en gebruik bakpanne of rolkoekpanne van 35 x 25 cm wat met bakpapier uitgevoer is.

Kaasstrooitjies

Rol twee velle in reghoeke van 28 cm x 35 cm. Borsel een geklopte eiergeel oor. Sprinkel ¼ t sout en ¼ t rissiepeper op een vel, daarna 55 g elk gerasperde Pecorino- en Parmesaanse kaas. Sit die ander vel bo-op. Sny dit in stroke van 28 cm x 1 cm; plaas dit in bakpanne, 2 cm uit mekaar. Draai elke deegstrook ’n paar keer. Bak vir 18 tot 20 minute of tot goudbruin. Laat afkoel. Maak 3.

Worsrolletjies

Sny een vel in vier stroke wat ewe groot is en sny elkeen dan oorkruis in 7 stukke. Plaas in ’n rolkoekpan. Maak insnydings oor die lengte in die middel van elke reghoek; druk een happiegrootte worsie in elkeen. Bak vir 15 minute. Meng 2 koppies gedreineerde sauerkraut met 2 teelepels karwysaad; bedien dit saam met mosterd op die rolletjies. Maak 28.

Parmesaan-en-ham-pasteitjies

Sny een vel in derdes en druk oraloor vol gaatjies. Bak vir 15 minute of tot goudbruin. Meng ½ koppie gerasperde Parmesaanse kaas, ½ koppie mayonnaise, koppie fyngekerfde ham, ¼ koppie gekapte grasuie en ¼ teelepel peper saam. Smeer dit oor die pastei. Bak vir 20 minute tot goudbruin. Sny in stroke van 2,2 cm. Maak 24.